محترم حضرت حکیم صاحب السلام علیکم! یہ تمام میرے آزمودہ ٹوٹکے ہیں عبقری کے قارئین اس پر عمل کریں اور فائدہ ہونے پر مجھے اپنی دعاؤں میں یاد رکھیں۔
دوائی کے سائیڈ ایفکیٹ سے بچنے کیلئے
جو بھی دوا کھائی جائے اس پر پہلے بارہ دفعہبِسْمِ اللہِ الرَّحْـمٰنِ الرَّحِیْمِ اور بارہ دفعہ کوئی سا بھی درود پاک پڑھ کر دوا پر دم کردیں ان شاء اللہ وہ دوا فائدہ ہی دے گی کبھی بھی دوا کا کوئی سائیڈ ایفکیٹ یا نقصان نہیں ہوگا۔
ابکائی روکنے کے لیے
اَوَ لَمْ یَرَ الْاِنْسَانُ اَنَّا خَلَقْنٰهُ مِنْ نُّطْفَةٍ فَاِذَا هُوَ خَصِیْمٌ مُّبِیْنٌ(سورئہ یٰسین، آیت۷۷)۔لکھ کر ایک گلاس پانی میں بھگو کر تھوڑا تھوڑا مریض کو پلاتے جائیں بہت جلد فائدہ ہوگا۔ ایک دفعہ والد صاحب کو بار بار ابکائی آرہی تھی لیکن الٹی نہیں ہورہی تھی دوائیں کھائیں لیکن کوئی فائدہ نہ ہوا پھر میں نے یہ آیت لکھ کر پانی میں بھگو دی اور وہ پانی ہر گھنٹے بعد تھوڑا تھوڑا پلایا دو تین گھنٹے میں ہی ابکائی آنا بند ہوگئی اور والد صاحب بالکل ٹھیک ہوگئے
سامان چوری ہونے کا کوئی ڈر نہیں
’’یَاجَلِیْلُ‘‘ دس بار پڑھ کر مال و اسباب اور رقم وغیرہ پر دم کردیا جائے تو ان شاء اللہ چوری سے محفوظ رہے گا اور اگر آیت الکرسی بھی ایک دفعہ پڑھ لی جائے تو بہت فائدہ مند ہے۔
بخار کم کرنے کے لیے
بخار کیلئے یہ آیت کریمہ سات بار اوّل آخر ایک بار درود شریف پڑھ کر مریض پر دم کریں بخار کی شدت میں نمایاں کمی محسوس ہوگی اور مریض کو سکون آئے گا۔’’لَا یَرَوْنَ فِیْـهَا شَـمْسًا وَّ لَا زَمْهَرِیْرًاۚ‘‘(الدھر:۷۶)
سینے میں درد کا فوری علاج
گیس کی وجہ سے بھی اکثر سینے میں درد ہو تا ہے۔ سورئہ فاتحہ اور سورئہ الم نشرح باوضو ہوکر سات سات مرتبہ پڑھ کر دم کریں اگر کوئی خود پڑھنا چاہے تو اپنا سیدھا ہاتھ سینے پر رکھتے ہوئے پڑھے ان شاء اللہ درد ختم ہو جائے گا۔
کان کے درد سے نجات کیلئے
روئی پر تین بار ’’یاسَـمِیْعُ‘‘ پڑھ کر دم کرکے کان میں لگالیں فوراً آرام آجائے گا۔
دانہ، پھنسی پھوڑے کے لیے
وہ دانہ، پھنسی یا پھوڑا جس کا منہ اندر ہو اور اس میں بہت جلن تکلیف ہو اور ڈاکٹر یہی کہیں کہ اس میں چیرا لگے گا اس کیلئے ایک ٹوٹکہ ہے کہ تخم بلنگو یعنی نیاز بو کے سیاہ بیج ایک چٹکی لیکر پانی میں بھگو دیں پھر ایک چوکور کپڑے کا ٹکڑا لیں جتنا بڑا دانہ ہے اتنا بڑا کپڑا لیں اور کپڑے کے درمیان میں ایک سوراخ کردیں چھوٹا سا اس کپڑے کے چاروں طرف تخم بلنگو لگادیں اور اس کپڑے کو دانے پر اس طرح رکھیں کہ دانے کے سنٹر میں سوراخ والا کپڑا ہو۔ لگاتے ہی جلن ختم ہوگی اور دانے کا منہ خود بننا شروع ہو گا اور بہت جلد دانہ آسانی سے پھٹ جائے گا اور سارا مواد کپڑے کے سنٹر میں جو سوراخ کیا تھا وہاں سے نکل جائے گا۔ دو تین دن میں ہی دانہ جڑ سے ختم ہو جائے گا یہ ٹوٹکہ ہم نے دو تین لوگوں کو بتایا سب کو ہی فوراً فائدہ ہوا یہ پٹی بناکر روز لگائیں۔
دانتوں کا درد ختم، مضبوط کرنے کیلئے
ایک اللہ والےرحمۃ اللہ علیہ فرماتے ہیں کہ جس کے دانتوں میں درد ہوتو وہ وتر کی پہلی رکعت سورئہ فاتحہ کے بعد سورئہ نصر پڑھے، دوسری رکعت میں سورئہ فاتحہ کے بعد سورئہ لہب پڑھے اور تیسری رکعت میں سورئہ فاتحہ کے بعد سورئہ اخلاص پڑھے ان شاء اللہ درد سے نجات ملے گی۔(یہ عمل پہلے بھی عبقری میں چھپ چکا)

 (افشاں دلشاد،کراچی)